Хашуры «Фаллаг фарс» хонынц уыцы бынаты, кæцы Мткъуарийы цæугæдоны рахиз былгæрон ис. Хохы рæбыны цалдæр хъæуы зыны.

Муниципалитеты центрмæ бацæуынæн Мткъварийы цæугæдоны сæрты ис 2-3 чысыл хид арæзт. Алы хидыл дæр ацæуæн ис æрмæстдæр иу машинæйæн.

«Фаллаг фарсы» хъæутæ ацы хидæй пайда кæнынц, сæйрагæй, уыцы цауы, кæд хъæуæй горæтмæ фистæгæй фæцæуынц. Машинæйы фæндагыл ацæуын ам алыхатт нæ вæййы фадат, уæлдайдæр та митуарды рæстæджы.

Елбакидзе Зураб уыдонæй сæ иу у, кæцы зæгъæн ис, æрвылбон Халебийы хъæуæй Хашурмæ фистæгæй фæцæуы.

Халебийы хъæу иуæй-иу у, кæцы ис Хашуры фаллаг фарс. Æндæр хъæутимæ абаргæйæ, уый у бирæнымæцон хъæу, кæд ам зымæджы рæстæджы баззайы æрмæстдæр 10-15 хæдзары бинонтæ, уæддæр.



Ихджын фæндаг Мткъварийы былгæронæй уæлæмæ цæуы. Рог хæдтулгæйæн ацы ихджын фæндагыл зын уыд схизын. Уымæ гæсгæ сфæнд кодтам хъæумæ фистæгæй цæуын.

Æвиппайды фæндагыл куыйты рæйын райхъуыст. Кæцæйдæр комæй фæндаджы ’рдæм згъордта иу куыдз. Мах афтæ æнхъæлдтам, æмæ куыдз æнæзонгæ адæмы фенгæйæ мæстыйæ згъордта мах æрдæм æмæ уый тыххæй нæ цыд фæсындæг кодтам, куыдз комæй фæндагмæ схызти. Куы згъоргæ кодта, куы та къахы фæдтæм смыста æмæ куы та рæйгæ кодта.

Чысыл алæууыдыстæм, фæлæ куыдз, кæцы цуанон куыдз разынд, æрмæст нæм иухатт ракасти, адарддæр кодта йæ рæйын æмæ къахы фæдтæм смудын. Фæндаджы иннæ фарсмæ ахызт æмæ уæлæмæ згъорын байдыдта. Бæрæг уыд, хъæддаг сырды фæдыл кæй цыдис. Цæстæнгасæй йæхи бааууон кодта æмæ йæ рæйын дæр нал хъуыст.



Хъæумæ куы баввахс стæм, уæд хур аныгуылд. Цæрæнуаты та æддейæ ничи зынди. Хъæу афтæ сабыр уыд, æнхъæлдтам, æмæ дзы ничи цæры. Хъæуы астæумæ куы бахæццæ стæм, уæд иу хæдзары цур, фосдарæнмæ хæстæг хосы мæкъуылтæ лæууыд. Ацы хосы бын хуыссыдысты дыууæ куыдз æмæ нæм сабырæй кастысты. Сыстын æмæ нæ размæ рацæуын, сæ хъуыдыйы дæр нæ уыд, куыд фæтк, куыдзы рæйынмæ-иу хæдзарæй фысым рацæуы.

Хъæуы астæумæ куы бацыдыстæм, уæд цалдæр хæдзары уæлхæдзæрттæй фæздæг цыдис. Се ‘хсæн уыд иу хъæдын хæдзар. Нæ фæндаг акодтам ацы хæдзары ’рдæм.

Кæртытæ, цæхæрадæттæ æмæ уæлхæдзæрттæ уыдысты митæй æмбæрзт. Иу кæртæй нæм нæлгоймаг ракасти. Уый уыд Елбакидзе Зураб, кæцыйы кой ракодтам уацы райдианы.




— Æз уын цы зæгъон? Цыппар азы рацыд хъæумæ куы æрцыдтæн уымæй. Мæ мад уыд рынчын, цыдис ыл 92 азмæ ввахс. Æрцыдтæн уый тыххæй, цæмæй йæм фæкæсон. Дыууæ азы йæм фæкастæн, стæй фæзиан. Дыууæ азы рацыд йæ амæлæтæй, фæлæ мæ бон нæу Уæрæсемæ аздæхын. Фæстæмæ ам дæн æмæ æвæццæгæн нал дæр ацæудзынæн. «Мæнæн ам уæвын хуыздæр у» – загъта нын Елбакидзе Зураб.

Хус сугтæ лыгтæ кодта пецæн. Уый фæстæ-иу æфсæйнаг хызыл тыгъд æнгузты æвзæрста, кæцыты фылдæр хай иу мыстытæ бахсыдтой. Зураб нын куыд радзырдта, афтæмæй мыстытæ тынг фæцахуыр сты æнгузты «давынмæ».