Ног хабæрттæ
Дихгæнæг хаххы цур æрцахст Къудухты Леуан йæ нанайы уынынмæ Ахалгорырдæм фæцæйцыд
Къаспы цæрæг, 31 аздзыд Къудухты Леуаны, знон, 31-æм июлы, дэ-факто Хуссар Ирыстоны минæвæрттæ Эргнеты постыл Гуырдзыстоны полицæмæ раттой.

Цхинвалы тæрхондоны уынаффæмæ гæсгæ, Къудухты Леуан а. х. арæныл рахизыны тыххæй, иваргонд æрцыд, 2000 сомы бæрцæй. Суммæ йæ фыдыфсымæр бафыста, кæцы специалонæй, йе ‘фсымæры хъæбулы ссæрибаркæныны тыххæй, Владикавказæй Цхинвалмæ æрцыди.

«Йæ нанайы уынынмæ фæцæйцыди Ахалгормæ», – зæгъы Дабрундашвили Майа, Къудухты Леуаны мад, – «æппæт йæ сабибонтæ уым арвыста æмæ йæ æрфæндыд ме фсины фенын. Стæй чысыл нуæзтджын дæр уыди æмæ уымæ гæсгæ аскъуыддзаг кодта, афтæ уæндонæй ахызын иннæ фарсмæ», - зыгъта нын Дабрундашвили Майа.

Изоляторæй ссæрибары фæстæ Къудухты Леуанæн уæддæр йæ бон нæ баци йæ нанайы фенын. Уалдзæгæй фæстæмæ кæрæдзийы нал федтой:

«Мæ нана ныртæккæ уым иунæгæй цæры. Уалдзæджы ацыди Ахалгормæ, цæмæй хæдзармæ æркæса. Иннæ рæстæджыты махмæ вæййы Къаспы. Ацы зымæджы цъус æнæфæразон уыди æмæ, йæм сæйрагæйдæр, мæ фырт зылдис хæдзары», - зæгъы Дабрундашвили Майа.

28-æм июлы Къудухты Леуан Ламисхъаны бæрæгбоны уыдис. Ивлисобайы бæрæгбоныл æввахс хиуæттимæ æмæ йе мгæрттимæ фæцæл кодта. Изæрырдæм йæ нанайы бабæрæг кæнын аскъуыддзаг кодта, фистæгæй Твауриты хъæуырдæм ацыди æмæ Ахмаджы цур дихгæнæг хаххæй ахызти.

Дихгæнæг хаххы цур уымæй Уæрæсейы æмæ дэ-факто Хуссар Ирыстоны æмбæстоны бæлвырдгæнæг гæххæтт æркуырдтой, кæцы йæм нæ разынди. Æмæ уый фæци йе рцахсыны аххосаг.

Print