Сакашеты лигъдæтты цæрæнуаты цæрæг бинонтæн æрдзон газы хынцæгтæ муниципалитеты бюджетæй балхæндзысты. Ай фæдыл знон 12-æм февралы уынаффæ райста Куртайы муниципалитеты гамгебели Миндиашвили Звиад.

Уый ныхасмæ гæсгæйæ, хынцæгтæ æвæрд æрцæудзæнис 31 хæдзары бинонтæн æмæ æхцайы суммæ «Сокар Джорджиа газæн» бафиддзысты. 2018 азы бюджетмæ ивддзинæдтæ бахæссынæн 14 мин ларийы рахицæнгонд æрцыд.

«2018 азы онг Сакашеты лигъдæтты цæрæнуаты нæ уыдис арæзт газы хынцæгтæ. 2017 азы кæроны райдыдтой газы хынцæгтæ æвæрын. Уымæн æмæ ацы лигъдæтты цæрæнуаты æппæтæй тынгдæр тыхст æмæ социалонæй æнæхъахъхъæд лигъдæттæ цæрынц. Лигъдæтты цæрæн уавæртæм æркæсгæйæ, Гамгеоба йæхимæ райста æрдзон газы хынцæгты сфинанс кæнын æмæ цæрæнуат ифтонггонд æрцæудзæни газы хынцæгтæй», - нысан кæны Миндиашвили Звиад скъуыддзаджы.

Бардзырдмæ гæсгæйæ, Куртайы муниципалитет æрмæстдæр ацы 31 хæдзарæн сфинанс кæндзæнис газы хынцæгтæ, кæцытæ Стыр Леуахигомæй лигъдæттæ сты. Сакашеты лигъдæтты цæрæнуаты цъус бинонтæ цæры, æдæппæтæй дзы ис 100 хæдзарæй чысыл фылдæр. Чысыл Леуахигомы æмæ Пронейы комы лигъдæттæм та, цы хауы, уый тыххæй, муниципалитетты уынаффæ нырма зындгонд нæу.

2008 азы августы хæсты фæстæ, Стыр æмæ Чысыл Леуахигомæй, афтæ ма ноджы, Пронейы комæй этникон гуырдзиæгтæ сæ цæрæн хæдзæрттæ ныууагътой. Уыдон æндæр æмæ æндæр цæрæнуæтты æрцæрын кодтой.