Кердихъошвили Ана æмæ Лонгиноз ныр цалдæр мæйы сæ хæдзары цалцæг кæныныл бахъуыдысты. Ус æмæ лæг куыд зæгъынц, уымæ гæсгæ, æрцыд рæстæг, æмæ Тъанайы комы цæрджытæ, туристты райсыныл хъуамæ райдайой хъуыды кæнын.

«Раздæр тынг зын уыд ууыл хъуыды кæнын, æмæ искæд махмæ дæр туристтæ райдыдтаиккой цæуын, фæлæ ныр æндæрхуызон хъуыды кæнæм. Мах ахæм бынаты цæрæм, цыран турист æдзухæй змæлы. Уыдис нын туристон компаниимæ фембæлд дæр æмæ йæ бамбæрстам, туризмы кæй ис стыр потенциал», - зæгъы Кердихъошвили Лонгиноз.

Бинонты уæнгтæ уазджытæн æрцæттæ кодтой кухнæ, фынæйгæнæн уат, хинайæн (ваннæ). Кæрты назы бæлæстæ, арахъхъ гæнæн ис рауадзай. Анайы хъуыдымæ гæсгæ, кæрты торне дæр сфидаудзæни.

«Нырма уал, нæхи фæрæзтæй аразæм алцыдæр, фæлæ йæ зонын, æмæ алцыппæтыл нæ аххæсдзыстæм. Бахъæудзæн нæ æнæмæнг хицауады ‘рдыгæй хъусдард æмæ æххуыс дæр, цæмæй нын хæрдзтæ фидын тынг зын ма уа. Сæйрагдæр нын дон уæд æдзухæй, æрбауадзæд æрдзон газ. Фæндаг хъæуы онг нормалон у», - зæгъы Кердихъошвили – Шавадзе Ана.

Бобнеуы хъæу Тъанайы комы цæугæдоны былыл ис. Дæрддзæф у алы стыр хъæуæй, Атъенæй 5-7 км-ы бæрц. Фæндагыл дзæвгар котеджтæ (ресторантæ) арæзт цæуы. Бобнеуæгтæ дзурынц, зæгъгæ, иу уый у, æмæ адæймаг улæфынмæ куы рбацæуы, дыккаг та - уый æмæ йын ам баззайынæн бынат куы нæ вæййы.

Ныртæккæ, хæрз цъус адæм цæры Бобнеуы хъæуы. У чысылнымæцон хъæу. Ацы хъæуæй фæндаг цæуы Биисы æхсæрдзæнырдæм æмæ Термулайы дæтты онг.

«Уыдис рæстæг, æмæ ам бирæ бинонтæ цард. Сæ иу хай 90-æм азты фæлыгъдысты, гуырдзиаг-ирон конфликты рæстæджы. Иннæ хайæн та, сæйрагæйдæр, æрыгæттæн æгуыстдзинад æмæ æнæперспективондзинад ныууадзын кодта хъæу æмæ фæцыдысты фæйнæрдæм хуыздæр цард агурæг», - зæгъы Кердихъошвили – Шавадзе Ана.